బ్రహ్మమురారి సురార్చిత లింగం
నిర్మలభాసిత శోభిత లింగం |
జన్మజ దుఃఖ వినాశక లింగం
తత్ప్రణమామి సదాశివ లింగం ‖ 1 ‖
దేవముని ప్రవరార్చిత లింగం
కామదహన కరుణాకర లింగం |
రావణ దర్ప వినాశన లింగం
తత్ప్రణమామి సదాశివ లింగం ‖ 2 ‖
సర్వ సుగంధ సులేపిత లింగం
బుద్ధి వివర్ధన కారణ లింగం |
సిద్ధ సురాసుర వందిత లింగం
తత్ప్రణమామి సదాశివ లింగం ‖ 3 ‖
కనక మహామణి భూషిత లింగం
ఫణి పరివేష్టిత శోభిత లింగం |
దక్షసుయజ్ఞ వినాశన లింగం
తత్ప్రణమామి సదాశివ లింగం ‖ 4 ‖
కుంకుమ చందన లేపిత లింగం
పంకజ హార సుశోభిత లింగం |
సంచిత పాప వినాశన లింగం
తత్ప్రణమామి సదాశివ లింగం ‖ 5 ‖
దేవగణార్చిత సేవిత లింగం
భావై-ర్భక్తిభిరేవ చ లింగం |
దినకర కోటి ప్రభాకర లింగం
తత్ప్రణమామి సదాశివ లింగం ‖ 6 ‖
అష్టదళోపరివేష్టిత లింగం
సర్వసముద్భవ కారణ లింగం |
అష్టదరిద్ర వినాశన లింగం
తత్ప్రణమామి సదాశివ లింగం ‖ 7 ‖
సురగురు సురవర పూజిత లింగం
సురవన పుష్ప సదార్చిత లింగం |
పరమపదం పరమాత్మక లింగం
తత్ప్రణమామి సదాశివ లింగం ‖ 8 ‖
లింగాష్టకమిదం పుణ్యం యః పఠేశ్శివ సన్నిధౌ |
శివలోకమవాప్నోతి శివేన సహ మోదతే ‖